Notiziole - Nuovo sito Illorai

Illorai
Vai ai contenuti

Notiziole

Illorai
Nigola Osu
Su brunzitu nuràgicu de Illorai
 
In su séculu  coladu, fint abberindhe s’istrada chi partit dae Sa Contonera de su Tirsu e  arrivit a Chilivani, atraessendhe su Gocèanu.
Triballendhe a  s’arrebbentadura, sos primos setighentos metros de istrada de su paris de Su  Lamparaditu che los ant fatos in d-unu bolu. Tandho fit meda onore a suerare.
Pustis de carchi  paja de chidas de triballu una truma de triballantes agatat za su nodu frimmu,  su duru de su montrigu de Sa Corona, in terrinu de Illorai e chircant de che  comintzare a frànghere sa preda móida.
Su capiscuadra,  chi tandho faghiat puru de mere, de diretore de su triballu e de totu, fit  sempre arrennegadu, cun s’abbau in buca chi pariat cane arrajoladu essidu dae  cadena; zughiat sos sessanta diàulos onzi minutu, sempre minetendhe, pariat chi  si cheriat iscuarterare.
Candho che li  pigaiant sos badhirones a cúcuru, dae in tantu in tantu, che catzaiat dae su  triballu carchi malevadadu bisonzosu, su chi li cumbinaiat a tretu.
Si ufraiat onz’iscuta,  si che artziaiat a s’aera, si che iscambuliaiat dae su triballu e si atrapaiat  in daisegus de sas matas de ozastru o in bia de sas rocas, pro torrare múndhinu  múndhinu, in punta de pè, pro buscare sos triballantes chistionendhe e pro lis  pònnere sa murta.
Candho si che  acusiaiat in punta de ungra, solu pro s’iscambiare mesa peràula a s’iscúsia e  pro isballos de nudha, che iscontaiat tantas oras a unu, mesa zoronada a s’àteru,  sa die intrea, duas dies, su chi li moliaiat in conca.
Fit isfidiadu  che cane fonnesu e umiliaiat sos operajos cun d-unu rosàriu de impropérios.
A primos de  làmpadas, in su montrigu de Sa Corona chi amus za fontomadu, duos compares de  Santu Zuanne, za suerados pilu pilu, in d-una perchighedha chi pariat un'ispétzia  de nitzu che alluntzinant duos idoledhos de metallu, chi fint duos bitelledhos,  unu múrinu, de brunzu, e unu galanu, de oro, e ses cotas lughentes de oro.
Custos compares,  cun s’isostre postu a manifestu a cúria, s’ant leadu unu bitelledhu perómine ca  nachi los poniant a gherrare: a si tzumbare e a s'incorrare.
Comintzat su  primu: "Binchet su meu! Binchet su galanu!"
S’àteru compare:  "Mancu a sonnu! Binchet su múrinu! Binchet su
meu!"
Faghindhe finta  de si minetare, atachendhe e iscrostiendhe, lis acusiaiant sos corros a pare  e  los faghiant brincare.
Brullendhe e  rindhe, pariat totu su mundhu a contu issoro.
Sos cumpanzos de  triballu, inzenuotos issos puru, s’ant sapidu sa movitia: "Ma ite sunt faghindhe  cussos listrones?" e siche sunt acusiados e issos puru ant comintzadu a fagher  sa parte chie a su bitelledhu galanu e chie a su múrinu.
Totu rindhe a  iscracàlliu: "Abbà arratza de ischina! Binchet su galanu!" - "No! Mancu a pessu!  Abbà arratza de nerbiadura su múrinu! Binchet custu!".
Illorai
Questa pagina è stata realizzata da    Giambattista Attene senza alcun contributo statale, regionale provinciale o    comunale
mailto:giambattene@tiscali.it      tel 3283026101
Illorai, 22.02.2000 - ultimo agg.    febbraio 2020 Tutti    i diritti sono riservati   
  
Torna ai contenuti