Mamma

Vírgine, bella, santa, immaculada,

Divina istella de su firmamentu

Chi lughes poderosa gai comente

Mai pessare at a poder mente umana,

E de prus puru, e cantu!, nos ses mama

E ti prego illughescas a sa zente

S’iscurigore chi li dat trummentu,

Ch’in allegria torret si no ndh’ada!

Ma prus e prus custu pregare meu

So faghindhe pro ch’in sa vida nostra

Che a su tou e de Cristos cudhu Fiat!

Fintzas su nostru cun su coro siat

Nâdu e cumpridu e sa manu bostra

Nos azuet glorifichendhe a Deu!

          A  su Tenore

Ses cuncordu, cussertu e ses consolu

Comente Mamma sarda ti at pesadu

In millénnios cantos che at coladu,

Antigu cantu e sempre noitolu;

E fintzas a su Chelu andhas a bolu,

Armonia, ti at Deus iscurtadu!,

Chi sos ànghelos bonos Li ant cantadu

E pro cussu lassadu ti at a donu.

Ses de sas prendhas pro s’umanidade,

Bandhera de sos Sardos cun onore

Bentulendhe in sos chelos de totue.

In sa mente e in su coro intres tue

Chi pesemus su càntigu ’e s’amore,

De cuncordu, cussertu e libbertade!

A Giuanni Pàulu II

Babbu santu, Babbai!, ànima bella,    

giòvane, manna, coragiosa e forte,    

sa Crésia ’e Cristos che nodia Istella    

as agghiau a su divinu Norte,

as giau isperas a s’Umanidade

in su caminu abbia a méngius sorte;    

de amore pontes po giusta unidade

as fatu largos e betau muros

po ch’in su mundhu dóminet sa paghe.

As apertu po Cristos coros duros,

as  tocau su coro a totugantos    

e prenu nosi dh’as de prus seguros

sentidos de istima. De is santos 

sa pramma tua est arta e dha bieus

che bandhera po àteros ispantos.

Po su bene chi ses e chi teneus,

donau bundhante a totu sa Terra,    

ringratziaus a s’Eternu Deus!