Fortza, Sardigna, pèsadi e camina! (si cantat che a No poto reposare, amore e coro)
1 Bogadiche, Sardigna, s’Istivale Ca ti faghet andhare sempre a topu: S’Istadu italianu no est nostru, Petzi ti tenet pro t’irfrutuare. Fàghedi onore libbertade istima: Fortza, Sardigna, pèsadi e camina! 2 Dominadore, de dominadores Colónia, su chi fis, t’at eredadu, Cudhos ch’innanti t’ant iscaminadu Unidos medas e isfrutadores. Fàghedi onore … 3 Zente istimada, no podes istare A birgonza in debbadas ispetendhe S’Itàlia ch’in tot’àteru est pessendhe Ca tenet runzas suas de ratare. Fàghedi onore… 4 S’Itàlia nos zughet in busaca Che una innenneria posta a un’ala, Nos at petzi mandhadu innoromala E figura faghimus tonta e maca. Fàghedi onore… 5 S’incuru totu chi nos at mustradu Est cudhu pro su pegus de masellu Cundennadu ne prova ne apellu A serbire comente at destinadu. Fàghedi onore… 6 Che incravada pro ti guvernare, No faghes ne de manos ne de pese E peus a disastru ’e su chi sese Bi est solu chi che afunghes in su mare! Fàghedi onore…
|
13 Candho mai a fagher pagamentas A unu ladru pro ti guvernare?! Tue sighis a perder sacu e sale Si de pedire a ladros ti cuntentas! Fàghedi onore… 14 Natzione distinta e sinnalada In sos séculos tenes sa bisura; Ma oe za la faghes sa figura Essindhe in tricolore mascarada!… Fàghedi onore… 15 Ti at fatu chentza numen ne resone Mancu a tie cumpares su chi sese, A chie ti collonat petzi crese Mancari ti apat postu a mamutone. Fàghedi onore… 16 Chentu otanta chilómitros de mare, Mancu s’Àfrica gai ch’est ifora!, Ne s’istória prus pretzisa ancora Paret chi bastant pro ti abbizare. Fàghedi onore… 17 Tot’ateruna zente e natzione, Terra chentza guvernu guvernada, Ti at lassadu che fémina ingannada Cun su burdu de itàlica Regione. Fàghedi onore… 18 A zente nos at fatu tzega e tonta De no bider manc’ue ndhe istamus E che macos illusos nos pessamus Su chi no semus, e ne ite contat! Fàghedi onore…
|
7 Su mesu de sa zente est emigrada, Sunt totu sas piaes in cranghena E isperas ancora in manu anzena Sa chi nche cheret própiu segada! Fàghedi onore… 8 Ca fitianu at fatu irfrutamentu Ti che at sutzadu sàmbene e suore E nudha, prus de istúpidu s’onore Cun irbandhonu, mai ndh’amus tentu. Fàghedi onore… 9 Sempre teraca posta a teracare, Ti at irfrutadu ca ses miniera, Pro sos cómudos suos a galera Ti at fatu totu e base militare. Fàghedi onore… 10 Ses fintzas bella a muntonarzu sou Ca tenet arga meda de frundhire; Tue mancu resessis a ischire Cantu e cale est su torracontu tou! Fàghedi onore… 11 No pro àteru fintzas ti consolas E ringràtzias puru e ti cuntentas Daghi tempus l’avassat e si ammentat, Candho totu passadu est de cassola! Fàghedi onore… 12 Ma si as de currer, a cambas truncadas Za tenes bellu isetu a mezorare!… No ndhe podes su passu a caminare Sighindhe a perder samben in debbadas. Fàghedi onore… …/…
|
19 A bartzolu de ódios ti at fatu, Pares sa tana ’e sos espes terranzos, T’isterres a tapeto a sos istranzos Ma tra Sardos faghimus disacatu! Fàghedi onore… 20 No amus fide in nois ma creimus, Si est istranzu, a donzi culu ’e cane Ch’inoghe si presentat e, infame!, Donzi borta unu corru ndhe tenimus! Fàghedi onore… 21 A fora da’inoghe Istadu istranzu, In Sardigna su Sardu torret mere: Diritu universale est e dovere E de nois dipendhat su balanzu! Fàghedi onore… 22 Sardigna, de guvernu no ndhe tenes Ca su chi naras e chi amus bidu Est anzenu, est atesu e t’est nemigu, Meritat tituladu Istruibbenes! Fàghedi onore… 23 S’Itàlia no est pessendhe a tie: A tie tocat chi bi pesses tue! In su mundhu su Sole bi est totue E fintzas pro te puru faghet die! Fàghedi onore, libbertade, istima: Fortza, Sardigna, pèsadi e camina!
|