Gosos de Sa Beata Virzine de Nives

 

 

chi si celebrat duas bortas de s’annu: sa die a poi de Sa Pasca Fiorida e su chimbe de austu a Luche in territoriu de Illorai.

 

Serenissima Signora

De sos Santos melodia,

Prega pro nois Maria

De Nives Nostra Signora.

 

Aurora rutillante

Gemma fine orientale,

Cristallinu diamante

Zemminu Celestiale,

Rosa intata Virzinale

De aflitos consoladora:

Prega ecc.

 

Aurora gloriosa

De sos chelos ornamentu,

In totu misteriosa

Maria vasu de argentu,

De tesoros fundamentu

De grassias dispensadora:

Prega ecc.

 

Tue ses s’arca triunfale

Circundada de clementzia,

Su Babbu celestiale

Ti donesit sa potentzia,

Su Fizu sa sapientzia

S’Ispiridu Santu ancora:

Prega ecc.

 

In su supremu cossizu

Da sa divina natura,

Risplendes candidu lizu

Piůs de dogni criatura,

Sende in sa celeste altura

De donos ministradora:

Prega ecc.

 

Chelu, astros, sole e luna

Ti cantan eternamente,

E t’aclaman tot’in d’una

Mamma de s’Onnipotente,

E cun Cristos giustamente

De males riparadora:

Prega ecc.

 

Sa gerarchia celeste

T’hat dadu candida istella,

Pretziosissima ‘este

De su sole pius bella,

O rica e santa donzella

De pupillos protetora:

Prega ecc.

 

Sa celeste gerarchia

Altas laudes intonesit,

Cando Gabriel s’inchinesit

Saludende: Ave Maria!

O lughe consolu e ghia

De s’anima pecadora:

Prega ecc.

 

Maria mare abbundante

De grassias in dogni cosa,

Maria sole illustante

De sa mente dubbitosa,

Maria candida rosa

Ch’in ‘ogn’anima innamora:

Prega ecc.

 

Gia chi ses tantu esaltada

Pro tantos donos Maria,

Tene pro incumandada

Cust’illustre cunfraria,

E nos sias lughe e ghia

In sa vida e in s’urtim’ora:

Prega ecc.

 

Serenissima Signora

De sos Santos melodia:

 

Prega pro nois Maria

De Nives Nostra Signora.


 

Tradizionale